Күрл Әрднь хан
Көдән чиңгә Көкәр дәврәд,
Далыннь герлд дала Җаңһриг
Далн хойр дарад одв.

Давхр олн лувцинь
Тас цокад,
Далыя хар махинь
Из цокад одв.

Далвлзгсн Шар Цоохр
Далн хойр бухад өңгрв.

Әәрстин хар товрцг
Альхнь тасртл гүвдлдв,
Зулг цаһан маңнадан
Зурһан мицһ дарлдад,
Җилгл мөңгн орадан
Җирн неҗәһәд дарлдад,
Байн хар цусн
Ундн болтлнь гүвдлдәд,
Баатр цаһан арснь
Хуйг болтлнь гүвдлдәд,
Эн хойр бодң
Арвн хойр хонгт
Ядлдгсн бәәдг.

Эзн нойн богд
Эвтәкн Зеердәр эргәд,
Арднь һарад өгв,
Әгр зандн җидәр
Олн ясна ниилдкәр армдад,
Дөш мөңгн эмәлинь
Бүүргтәһинь ташр армдад сегсрв.

Дөшлгнднь дүүвр Зеерд
Дөчн дөрв оңх бәәв.

Дасгсн Җаңһр
Алдл уга авад һарв;
Әгр зандн җидин үзүрт
Авб чигн,
Арвн цаһан хурһндан
Авдг арһинь ядв;
Арин дөрвн көвүн талан һарв.

Кек һалзн күлг
Нег тиирв - ширҗңнв,
Хойр тиирв - лүчңнв,
Әгр зандн җид
Лун дун мет лүчңнәд,
Хуһрад одв.

Алдр нойн Җаңһр
Ар дөрвн көвү темцәд зулв.

Адрһта һазрт альвн Зеерд
Һарад одв.

Адрһн уга һазрт
Күчтә Күрл күцәд йовна.

Тиигҗ йовх хараһинь
Бумбин Улан Хоңһр үзв.

- Арг Улан Хоңһран күртл тор! -
Гиһәд хәәкрв.

Хоңһр күрәд ирв. Күрч ирәд,
Күрл Әрднь Җаңһр хойран
Олҗ ядад бәәв:
Деегшән одгсн хара ядад бәәв,
Делкэһәр одгсн бара ядад бәәв.

[<<][<] [5] [6] [7] [8] [9] [>][>>]