- Нег цагин селгәһәр
Алдулсн зеерд адун
Нег цагин селгәһәр ирх!
Дордын долан орни
Күсл болҗ суусн
Бий мини эн лүүвн.

Деедин арвн хойр орни
Зүүдн болҗ, бийләрн әдл.

Һучн тавн бодңта,
Бийәсн үдү Арг Улан Хоңһрта;
Эн вер мини соңса бәәҗ,
Күч уга бирмн авгсн уга!
Көөрк Бумбин оран батлтн! - гив.
Бумбин Улан Хоңһр зәрлг болв:
- Арг Улан Хоңһртаһан
Бәәһә бәәҗ,
Ар Бумбин оран батлв гих,
Миңһн һалвин му нерн!
Эзн нойн богд зәрлг болв:
- Адуг мини
Альк үзг талан авб?
Алтн Чееҗ,
Әәлдәд келҗ ас! - гив.

Арвн хойр хонгт
Алтн Чееҗ эс медәд бәәв.
Эзн нойн богд зәрлг болв:
- Эртин экн цагт,
Эҗ уга көдә цагт
Дордын долан ор
Номдан орулад,
Күлг мөрн мини зовҗ,
Күбч мини чилҗ,
Хәрҗ йовлав;
Йовтлм,
Дөчн дөрвн толһата
Дөнд хар мус харһад ирв.

Дөчн толһаһинь тас цокҗ оркад,
Эмҗл нертә элкинь
Йү татҗ оркад,
Эрвлзгсн Зеердәр,
Зулад һарлав.

Тер мус ард мини
Әмнь һархла,
"Үзңгин өнчн Җаңһр,
Үүнән чамас
Эс авдг болхнъ!" - гиһәд,
Ам алдад хәәкрәд,
Әмнь һарла.

Тер хама оч төрв гихв?
Бусд алдр хаани көвүн,
Бор Маңна,
Бумблуһин тугин
Сәәхн Зеерд мини
Тавл! - гив.

Бор Маңна
Кееһин шинҗүр мөңгн ногтынь авад,
Шивд мөңгн хазаринь авад,
Гүүһәд һарв.

Бумблуһин каазин дунд,
Бусл дөрвн зандн һолын цутхлңд
Залу модн һасиг
Зандн күнд шааврар
Замб Түвдин орн
Дөрглтл шааһад архлгсн
Залу сәәхн Зеерд
Тавтан күрч тарһлгсн,
Архлань тунҗр мөңгн ногтан
Мөлт татад,
Билгин шивд мөңгн хазаринь
Хадг алтн ууд хавлулад,
Адг долан алд
Дүгр алтн сояһарн
Хавлн шүүрәд авб.

[<<][<] [1] [2] [3] [4] [5] [>][>>]