Салдрһинь уйхин алднд
Сар мөңгн көмлдрһ
Сай дунднь җиңнәд,
Дегц сәәхн дел деернь
Тасм сәәхн җола тальвад,
Буһ мөңгн цулврас көтләд,
Һо зандна йозурт,
Һольшг улан элснд
Долан хонг уйв.

Зеерд тав болад ирв.
Тав болсн кемҗәнь
Ямаран гидг болхни:
Һомбин улан гесиг
Һол талан авад,
Дарцг цаһан әрвңгиг
Давсг талан авад,
Чикн цацу далң
Цорһ болад,
Нүдн цацу күкл
Эрвң болад,
Сән бийән саәр талан авад,
Сәәхн бийән чееҗ талан авад,
Хурдн бийән дөрвн һашг алтн
Турун талан авад,
Туула сәәхн зоота,
Тошл сәәхн һуйта,
Ялмн сәәхн хаата,
Өрм сәәхн нүдтә,
Өргү саәхн чееҗтә
Дөлвлзгсн сәәхн Зеердиг
Дүүвр Җаңһрин өргә зөрүлв.
Тоххин седгән болв.

Дег мөңгн делтр тальвб,
Дегц мөңгн тохм тальвб,
Дөш мөңгн эмәл тальвб,
Зуурлдгч зуран экинь
Зууһин шар алтн худрһинь гүвдәд унв,
Шур сәәхн сүүлинь сеглҗ бәәһәд,
Зуран хар мах дарулв,
Лаң шар алтн омрувчиннь
Далн хойр шар алтн товч
Далын бәргр хар махнд
Дәәвлтл татад товчлв;
Буһин мөңгн цулврас бәрәд,
Богдын үүднд цервүлв.
Эзн нойн Җаңһр
Эвинь олҗ хувцлв,
Эрвң нертә киилг зооглад,
Эрдни хулын бүшмүд зооглад,
Дөш цаһан биизән зооглад,
Үүниг цуһараг дарулхд
Далн туулн мөрн үнтә
Бүкр луудң бүсән бүслв,
Намчин нег өрк үнтә
Лаң шар цоохр альчур хавчулв,
Дәәни олн лувц лувцлв,
Дегнән олн хуйг өмсв,
Зер-зевэн агсв,
Һучн царин арсар һоллгсн,
Далн царин арсар девллгсн,
Һуру һазр цаһан мөңгәр товчлгсн,
Дөрү һазр цаһан мөңгәр альхлгсн,
Нәәтг залу занднла харһулҗ ишлгсн,
Иш маля хойр зоклцгсн маляг
Барун һартан бәрәд,
Күдр зандн эрк алхад һарв.

Күсгсн Зеерд күрл мөңгн
Дөрә өгәд чичрв;
Күрл мөңгн дөрәд
Күдр алтн тах
Күрхин алднд
Күсгсн Зеерд
Хах сумн мет һолһалв,
Дуут олн цахраи
Дуһрн бульгад одв;
Барун аминь нуһлад,
Барун өвдг деерән авад.

Бумбин Күҗ Зандн өргә
Барун ам татад һарв.

[<<][<] [1] [2] [3] [4] [5] [>][>>]